Naqdinta Ururada Islaamiga Ah: Talo  

Siciid Cali Axmed | saidahmed@usa.net

April 9, 2002

Ka dib markaan maanta ka akhriyay boggoga Somalitalk maqaalo laba ah oo ciwaankoodu kala ahaa “Al-islaax ma urur Diineed baa Mise waa mid daneed” iyo  “AL-ISLAAX WAA URUR DIIN IYO ADUUNYO, ayaa waxaan jeclaaday in aan mawduucan in yar oo talo ah ku darsado.

Walaalayaal, xaalada ay maanta marayso ummada Muslimku waa mid aan wax badan u baahanayn in laga sheego waayo waa mid qofkastaba u muuqata. Kala daadsanaata, khilaafaadka iyo is nacaybka ka dhexeeya dadka Muslimiinta ahi waa sabab kamida sababaha waawayn ee ummada Muslimka aha musiibooyinku ugu dhacayaan. In laga tago kala daadsanaanta iyo is nacaybku waxa ay sabab u noqon kartaa mustaqbal fiican oo u soo hoyda ummadan muslimiinta ah ee maanta meel kasta dhiigeedu daadanayo.  

Dhaliinyarada wadaada ahi intii ay waqtigooda ku lumin lahaayeen in ay dhexdooda iska naqdiyaan oo iyagu isku mashquulaan waxaan soo jeedin lahaa in ay tamartooda (Energy) ku bixiyaan sidii ay u waajihi lahaayeen turunturooyinka waaweeyn ee umadooda hor yaala kuwaas oo maalinba maalinta ka danbeeya sii xoogaysanaya. Waa in ay ku dadaalaan  adkaynta midnimada safka muslimiinta oo ay iyagu ugu horeeyaan. Marka aan sidaa leeyahay umma jeedo in aan idhaahdo qaladaadka1 ay ku dhacayaan urururadasi ha laga aamuso. Maya, waxa aan u jeedaa waxa weeye in khaladaadkaas iyo tilmaamintoodu aaanay noqonin mid ina ilowsiisa inta badan ee a kulmisa ururadaa.   

Waxa aan aaminsanahay in dacawada islaamka ah ee Soomaaliya ka jirtaa ay taariikho iyo duruufo kala duwan ay soo maratay , waxaana aan shaki lahayn in mudadaas ay dhaceen khladaad u baahan in dib loo eego lana saxo. Sixida iyo toosinta qaladaadkaasi waa in ay noqotaa mid hadafkoodu yahay in la la toosiyo masiirka mustaqbaliga ah ee ururada Islaamiga ah. Nuqdooyinka  hoos ku qoran aragtidayada waa qaar ina caawin kara marka aynu rabno in aynu naqdino dadka aynu aragtida ku khilaafsanahay :  

1)    In la naqdiyo ururada Wadaadada iyo kuwa kaleba waa arin aan xumayan aragtidayada waana in la soo dhaweeyaa laakiin waxaa loo baahanayahay in naqdintaasi ay noqoto mid wax dhisaysa (constructive criticism) ee aanay noqon  mid looga dan leeyahay in ay wax burburiso (Destructive criticism).  

2)    In Naqdinta shakhsiyaadka la iska daayo oo ay naqdintu noqoto mid ku waajahan fikradaha iyo mabaadiida ururada. Sidaas oo kale waxa ay ila tahay wax diidayaa in aanay jirin hadii naqdintu tahay mid ku waajahan mawaaqifta Dacawiga ah amaba Siyaasiga ah ee ay Ururadaasi qaataan.  

3)    In la qiro in Xarakooyinka Islaamku ay yihiin bani-aadmi isu yimid bani-aadmigana waxa sifadiisa ah in uu qaldamo Cid aan qaldamina ma jirto marka laga reebo macsuumkii Maxmed ahaa (calayhi salaatu wasalaam)  

4)    Waa  in qofka wax naqdinayaa waxa uu  naqdinayo cilmi fiican u leeyahay, tani waxa ay fududaynaysaa in naqdintu  noqto mid ku dhisan manhaj cilmiya iyo macluumaad sax ah.  

5)    In qofka wax naqdinayaa uu yahay mid ka fog tacasubka indhaha la kaas oo keena in qofku arko uun daldaloolaadka waxaa uu naqdinayo

Mahadsanidin

Siciid Cali Axmed

saidahmed@usa.net

FAAFIN: SOMALITALK.COM | April 9, 2002

EMAIL MAGACAAGA AH  KAFURO SOMALITALK